كيف تعمل السيارة: 2 – الأسماء المستعملة فى مصر لأجزاء المحرك

كيف تعمل السيارة: 2 – الأسماء المستعملة فى مصر لأجزاء المحرك             

استكمالاً لسلسة تعرف على سيارتك وكيف تعمل السيارة بقلم، نعرض عليكم اليوم الجزء الثاني من السلسلة وهو التعرف على الأسماء الشائعة التي تُطلق على أجزاء محرك السيارة

أرجو قبل قراءة هذة الرسالة قراءة الموضوع (شرح مبسط لكيفية عمل المحرك) لان هذة الرسالة مبنية عليها

بعد ان تعرفنا على كيقية عمل محرك السيارة وفكرته المبنية على سحب كميات بسيطة من الوقود وخلطها مع الهواء ثم ضغطها وإشعالها و ألإستفادة من الضغط الناتج من تمدد الخليط فى تدوير المحرك والسيارة، نبدأ فى التعرف على الأجزاء الميكانيكية التى يهذة المهمة: والأسماء التى يستعملها الفنيون فى مصر لهذة الأجزاء.

إذا نظرنا الى المحرك من اعلى الى اسفل فسنجد انه مكون من ثلاثة أو اربعة كتل إحداها فوق الأخرى ومربوطة ببعضها(ملحوظة، كل ما سنقوله عن شكل المحرك لا ينطبق على الفولكس بيتلز القديمة لأن لها تصميم مختلف الى حد ما)، ولكن يمكن تقسيمه الى جزئين اساسيين، البلوك، وهو يمثل النصف السقلى للمحرك ومصنوع من الحديد ولونه رمادى غامق يميل الى لون الصدأ احيانا، ومربوطة فيه من أسفل كارتيرة الزيت(وعاء تجميع الزيت) وعادة تكون مصنوعة من الصاج ومدهونة بالأسود،اما النصف العلوى للمحرك فهو الجزء المسمى وش السلندر ومصنوع من سبائك الألومنيوم(الأنتيمونيا) واحيانا يكون اعلاه جزء اخر يسمى بيت الكامة( وهذا يوجد فى السيارات ذات عمود الكامة العلوى المنفصل) وفي اعلاه يوجد غطاء يغطى مكان الكامة او التاكيهات او الإثنين يسمى غطاء التاكيهات، يصنع فى بعض الموديلات من الأنتيمونيا (الشاهين 1400 مثلا) كما يصنع فى موديلات اخرى من الصاج(لانسر كريستالة مثلا) وفى موديلات اخرى من البلاستيك(لانوس مثلا)

نمسك الأجزاء دى حته حتة ونسمى القطع الموجودة فيها، لو احنا فاكرين فى الرسالة السابقة لما حكينا عن الحقنة الطبية ذات الفتحتين من اعلى واللى متركب فيها ولاعة بوتاجاز من فوق، لو احنا حبينا نعرف ايه اللى موجود من الحقنة دى فى البلوك وايه فى وش السلندر، هنلاقى ان البلوك عبارة عن مجموعة تجاويف الحقن دى،يعنى احن لو فكينا البلوك وشفناه لوحدة هنلاقى انه عبارة عن كتلة معدنية مستطيلة الشكل تقريبا فيها اربعة تجاويف إسطوانية كبيرة نافدة من فوق لتحت ممكن تعدى ايدك من اى تجويف منها حواليها تجاويف تانية اصغر مختلفة الأشكال، التجاويف الإسطوانية الكبيرة دى لو دققت فيها هتلاقى انها عبارة عن اسطوانات معدنية متركبة فى جسم البلوك نفسة، كأن كل واحدة منها ماسورة إسطوانية متبيته تجويف أوسع فى جسم البلوك، طيب لية معمولة مواسير كدا ومش عاملن خرم فى جسم البلوك وخلاص، علشان البلوك معمول من الزهر والزهر مايستحملش الضغط والنار اللى بتبقى فى غرف الحريق دى فنركب جواه الإسطوانات المصنوعة من الصلب الكربونى دى، كل واحدة من الإسطوانات دى إسمها شميز والكلمة دى اصلها فرنساوى زى كل المصطلحات القديمة بتاعة العربيات، وكلمة شميز بالفرنساوى معناها قميص على حد علمى، الإسطوانات او شمايز دى هى اللى بتركب جواها البستم(تحريف مصرى لكملة pisotn) اللى شرحنا دوره فى الرسالة الماضية، يعنى البلوك متركب فيه أربعة شمايز، كل شميز فيه بستم، والبستم بيبقى على شكل إسطوانة مصنوع من الأنتيمونيا،ليه انتيمونيا مش حديد؟ علشان وزنها خفيف وبالتالى حركة البستم طالع نازل ماتسحبش كتير من طالفة المحرك، لكن الأنتيمونيا لا تتحمل الأحتكاك بجدران الإسطوانة(الشميز) وهتتنحل بسرعة، علشان كدة البستم مش هوا االلى بيكون ملامس لجدران الإسطوانة(الشميز) لكن البستم بكون قطره اقل حاجة بسيطة(جزء من المللى متر) من القطر الداخلى للشميز، والبستم بيكون فيه من الجانب تلات تفريغات تحت بعض، كل تفريغ منها واخد جدار البستم داير مايدور، إرتفاع كل تفريغ حوالى 3 مللى وعمقة برض حوالى 3 مللى، التفريغات دى بيتركب في كل واحد منها غويشة صلب، الغويشة دى بيكون قطرها قد قطرالشميز الداخلى بالضبط، الغوايش دى بنسميها شنابر جمع شنبر وبرضه هى كلمة مقتبسة عن الفرنساوى، والشنابر دى هى اللى بتحبك الحريق والضغط فوق البستم وتمنعه من الهروب لغرفة الكرنك والزيت اسفل البستم، وهى برضه اللى بتمنع دخول الزيت الى غرفة الحريق اعلى البستم، علشان كدة لما المحرك يقدم والشانبر تتآكل الضغط بيهرب الى غرفة الزيت والزيت بيدخل الى غرفة الحريق ويتحرق مع الوقود ويطلع من الشكمان فى شكل دخنة بيضا ويقال ان الموتور فاوت، وفاوت معناها انه بقى منفد من فوق البستم لتحت البستم

بعد ما خلصنا اسماء الأجزاء الموجودة داخل غرفة الإحتراق(البلوك، الشميز، البستم، الشنبر ، نكمر رحلتنا مع باقى الأجزاء الموجودة فى البلوك،فى شرحنا لفكرة عمل المحرك فى رسالة(كيف تعمل السيارة:1- شرح مبسط لكيفية عمل المحرك) اتفقنا ان البستم له دراع نازل منه ، متوصل فى البستم بمفصلة تسمح للدراع دا انه يروح وييجى زى البندول، المقصلة دى اسمها البنز ومصنوعة من الصلب وبتبقى بايتة فى تجويف خاص بها فى البستم وراكب فيها الدراع اللى اسمه البييل( بتتنطق بى-ييل) ، البييل راكب من طرفة السفلى فى عمود الكرنك، بس مش بيكون راكب فيه مباشرة، بتككون فيه بينهم غويشة دائرية راكبه على الكرنك وراكب عليها البييل، الغويشة دى اسمها السبيكة ووظيفتها انها تحمى الكرنك والبييل من التأكل، أسفل الكرنك يوجد وعاء الزيت اللى بنفول عليه كارتيرة الزيت، وبتكون فيه طرمبة الزيت المسئولة عن سحب الزيت من الوعاء وضغطه الى كافة الأجزاء المحتاجة تزييت فى العربية، والكارتيرة بيكون فيها من اسفل طبة(صامولة مصمته) وظيفتها تفريغ زيت العربية لما نفتحها ساعة غيار الزيت

عمود الكرنك بكون فى طرفه الأمامى طنبورتين(طنبورة =طارة=حاجة مدورة بيركب عليها سير) ، الطنبورة الداخلية ودى بيركب عليها سير الكاتينة اللى بيشغل عمود او عمودين الكامة و عمود الإسبراتير(دورهم جاى ماتتخضوش من الأسماء)، دى عادة بتكون مسننة ومتدارية هى وسير الكاتينة داخل غلاف بلاستك او معدن اسمه وش التقسيمة بيكون مغطى مجموعة الكاتينة، الطارة اللى من برة بيكون فيها مجرى واحد او اتنين او تلاتة حسب عدد السيور اللى هاتركب فيها، ودى مسئولة عن تغدية الدينامو وطرمبة المية والتكييف إن وجد وطرمبة الباور ستيرنج إن وجدت.

اما من الطرف الأخر من عمود الكرنك بتكون راكبة فيه العجلة الحدافة ولها إسم تانى هو الفولام(تنطف بحرف V الإنجليزى) و هى على شكل ترس قطرة من 30 الى 40 سم ومسننة ولها وظيقتين، الأولى الحفاظ على سرعة دوران ثابتة للمحرك بدون رعشة نتيجة لقوة إندفاعها ، الحاجة التانية ان هى دى الجزء من المحرك إللى المارش بيعشق فيه لحظة تدوير السيارة(المارش هو المحرك الكهربى الصغير الذى يدير محرك العربية كما شرحنا فى رسالة شرح عمل المحرك).

ننتقل بعد كدة الى وش السلندر، احنا اتفقنا ان وش السلندر فيه صبابات، لو كل سلندر له صباب واحد للبنزين وآخر للعادم يبقى عندنا 8 صباب لكن لو كل سلندر له 2 صباب للبنزين و2 للعادم يبقى عندنا 16 صباب

كل صباب له قاعدة صباب عبارة عن حلقة معدينة بياتة فى وش السلندر، وكاوتش صباب، وسوستة صباب، عمود الكامة لو هو من النوع over head cam يبيكون فيه بينة وبين الصباب قطعة معدنية على شكل كباية مقلوبة بنسميها كستبان، داخل هذا الكستبان يوجد طبق من الصلب هو اللى بنغيره ساعة ضبط التاكيهات، لو الكامة مش over head cam بيكون بينها وبين الصباب رافعة من النوع الأول تسمى تاكيه

دايما وش السلندر بيكون متغطى بغطاء صاج او بلاستيك لمنع تسرب الزيت وفيه بينه وبين جسم وش وش السلندر جوان